Avropa artıq müharibədən əvvəlki mərhələyə qədəm qoyub.
Bunu Polşanın baş naziri Donald Tusk Almaniyanın “Die Welt” qəzetinə müsahibəsində bildirib.
Müharibə xəbərdarlığı edən Tusk bildirib ki, hazırda Avropa müharibəöncəsi mərhələyə qədəm qoyub, lakin Rusiyanın yaratdığı təhlükə ilə üzləşməyə hazır olana qədər hələ müəyyən bir vaxt var.
“Müharibə artıq keçmişdən gələn bir anlayış deyil. Bu, realdır və iki ildən çoxdur ki, başlayıb. Hazırda ən qorxulusu odur ki, sözün əsl mənasında istənilən ssenari mümkündür. Biz 1945-ci ildən bəri belə bir vəziyyət görməmişdik”, - Tusk bildirib.
Onun sözlərinə görə, dedikləri, xüsusilə gənc nəsil üçün dağıdıcı səslənir, lakin Avropa yeni bir dövrün başladığına, yəni müharibəöncəsi dövrə öyrəşməlidir. "Mən şişirtmirəm və bu hər keçən gün daha aydın şəkildə özünü büruzə verir", - Tusk qeyd edib.
