Məlum olduğu kimi, Ermənistanın Baş naziri Nikol Paşinyan aprelin 5-də Brüsselə səfər edəcək.
O, səfər çərçivəsində Avropa Komissiyasının sədri Ursula fon der Leyen və ABŞ-nin dövlət katibi Entoni Blinkenlə görüşəcək. Görüşdə Ermənistanın inkişafına fayda verən üçtərəfli əməkdaşlıq yollarının müzakirə ediləcəyi açıqlanıb. Lakin buna baxmayaraq, tərəflər arasında hərbi paktın imzalana biləcəyi ehtimalları səsləndirilir.
Maraqlıdır, 5 apreldə belə bir pakt imzalana bilərmi? Əgər imzalanarsa, bölgədə nə dəyişəcək?
AĞ Partiya sədrinin birinci müavini, politoloq Əhəd Məmmədli “Cebhe.info”-ya açıqlamasında bildirib ki, belə bir hərbi pakt imzalana bilər:
“Bu, Azərbaycanla Rusiya arasında imzalanan müttəfiqliyə cavab olaraq imzalana bilər. Amma Azərbaycan Rusiya ilə müttəfiq olsa da, yenə də Ukraynaya yardım edir. Hətta Ukrayna lideri Volodimir Zelenski buna görə dəfələrlə Prezident İlham Əliyevə təşəkkür edib. Çünki balanslı siyasət aparırıq. Lakin Ermənistanın balanslı siyasət aparmaq imkanı yoxdur.
Əslində, hərbi pakt da iki cür ola bilir. Məsələn, Azərbaycanın həm Rusiya, həm də Türkiyə ilə müttəfiqliyi var. Rusiyadan silah alırıq, münasibətlərimizi normal saxlayırıq, amma öz maraqlaramız var. Türkiyə ilə Azərbaycanın müttəfiqliyinin isə dünyada analoqu yoxdur”.
Ekspertin sözlərinə görə, Ermənistanın Qərblə pakt imzalasa da, Kreml İrəvana hədə-qorxu ritorikasından o tərəfə keçməyəcək:
“Amma Ermənistandan o paktda götürəcəyi öhdəliyə uyğun olaraq Avrasiya İqtisadi İttifaqı və Kollektiv Təhlükəsizlik Müqaviləsi Təşkilatından (KTMT) çıxması tələb oluna bilər. O zaman Rusiya hansısa addımlar atmağa məcbur qalacaq, çünki Ermənistan regiondakı yeganə forpostudur. Əks təqdirdə, Rusiya Cənubi Qafqazı itirəcək. Ümumiyyətlə, ehtimal olunan bu pakt Rusiyaya, Azərbaycana, hətta müəyyən mənada Türkiyə və İrana qarşı olacaq. Bu, o deməkdir, Ermənistan regionun bütün ölkələrini qarşısına alacaq”.
Politoloq hesab edir ki, Ermənistanın Rusiyaya qarşı çıxması ağılsızlıqdır:
“Allah kimisə cəzalandırmaq istəyəndə əvvəlcə ağlını alır. Fikrimcə, Allah ermənilərin ağlını alıb. Çünki Ermənistan indiyə kimi ona hamilik edən Rusiyaya qarşı çıxır. Deməli, erməni xalqı da, hakimiyyəti də ağlını itirib. Nə gözəl! Bizə sərf edir, bundan istifadə edə bilərik”.
