Azərbaycan Prezidenti İlham Əliyev tərəfindən anklavlarla və bitişik bölgələlə bağlı məsələ həllini tapdı.
Bunu Teleqraf.com-a Böyük Quruluş Partiyasının sədri, Milli Məclisin deputatı Fazil Mustafa deyib.
Onun sözlərinə görə, Azərbaycanın mövqeyi birmənalı şəkildə tam aydın diqqətə çatdırıldı:
"Xüsusilə də Prezident İlham Əliyev bitişik ərazilərin heç bir danışıq mövzusu olmadığını, anklavların isə müzakirə olunacağını söylədi. Burda da Prezidentin əsas arqumenti o budur ki, anklavlar həm də onların təhlükəsizlik baxımından müəyyən yolun çəkilməsi və mühafizə olunması problemini də gündəmə gətirir. Bunu təmin etmək hər iki tərəf üçün ciddi problemlərdə yarada bilir. Böyük qoruma mexanizmlərinin müəyyən olunması da problemləri ortaya çıxarır. Anklavlar məsələsində bu cür mövqe danışıqların mövzusu üçün də müəyyən yer saxlamış oldu. Digər məsələlərdə yenə də mövqe aydın oldu ki, bir başa Azərbaycanla Ermənistan arasında danışıqların olması daha zəruridir. Yol məsələsində də Prezidentin fikirləri tam aydın göstərildi ki, heç bir halda Azərbaycan əlavə yolun açılması üzərində düşünmək niyətində deyil. Zəngəzur dəhlizinin alternativi yoxdur. Belə mövqe Ermənistan tərəfindən qəbul olunarsa, sülhün yaxında olduğunu söyləmək olar. Hələ ki, buna isti yanaşma yoxdur. Amma pozitiv açıqlamalar var. Bütövlükdə köklü şəkildə bu problemin həlli istiqamətində yanaşma müşahidə olunmur. Bu da hələ ki, ümidləri bir az sonraya ertələmək üçün əsas verir".
