Gəncə şəhərində həyata keçirilən idarəçilik fəaliyyətində vətəndaşlarla birbaşa ünsiyyətə, onların müraciətlərinin yerində dinlənilməsinə və problemlərin həlli istiqamətində çevik addımların atılmasına xüsusi önəm verilir. Gəncə Şəhər İcra Hakimiyyətinin başçısı Niyazi Bayramovun mütəmadi olaraq sakinlərlə keçirdiyi görüşlər də bu yanaşmanın bariz nümunəsidir. Şəhər rəhbərinin insanlarla üz-üzə görüşməsi, onların qayğı və təkliflərini şəxsən dinləməsi idarəçilikdə vətəndaş məmnunluğunun ön planda saxlanıldığını göstərir. Belə görüşlər həm sakinlərin dövlət qurumlarına müraciət imkanlarını asanlaşdırır, həm də qaldırılan məsələlərin aidiyyəti üzrə daha çevik şəkildə araşdırılmasına şərait yaradır.
Niyazi Bayramovun Gəncə Dövlət Universitetinin IV tədris binasında şəhər sakinləri ilə keçirdiyi növbəti səyyar görüş də məhz insanlara yaxın idarəçilik prinsipinin davamı kimi diqqət çəkib. Görüşdə Gəncə Şəhər İcra Hakimiyyəti başçısı Aparatının məsul əməkdaşlarının, bələdiyyə sədrlərinin, müxtəlif idarə, müəssisə və təşkilat rəhbərlərinin iştirakı sakinlərin müraciətlərinin birbaşa aidiyyəti şəxslərin iştirakı ilə müzakirəsinə imkan yaradıb. Bu formatın mühüm üstünlüyü ondan ibarətdir ki, vətəndaşın qaldırdığı məsələ yalnız dinlənilmir, eyni zamanda onun həlli üçün məsul qurumlar qarşısında konkret vəzifələr müəyyənləşdirilir.
Görüş zamanı sakinlər tərəfindən işlə təminat, maddi yardım və digər sosial məsələlərlə bağlı müraciətlər səsləndirilib. Niyazi Bayramov hər bir müraciətin diqqətlə araşdırılmasına yanaşaraq, mümkün məsələlərin yerindəcə həlli, əlavə araşdırma tələb edən müraciətlərin isə qanunvericiliyin tələblərinə uyğun şəkildə icraya yönəldilməsi üçün müvafiq tapşırıqlar verib. Bir sıra məsələlərin elə görüş zamanı öz həllini tapması vətəndaş qəbulunun yalnız formal xarakter daşımadığını, nəticəyə hesablanmış iş prinsipinin əsas götürüldüyünü göstərən mühüm məqamlardandır.
Şəhər rəhbərliyinin fəaliyyətində sosial məsələlərə həssas münasibət xüsusi əhəmiyyət daşıyır. İnsanların gündəlik həyatında qarşılaşdıqları problemlərin öyrənilməsi, məşğulluq, sosial təminat, kommunal və digər məsələlərin aidiyyəti qurumlarla birlikdə araşdırılması Gəncədə idarəçiliklə vətəndaş arasında əlaqələrin daha da möhkəmlənməsinə xidmət edir. Niyazi Bayramovun müxtəlif ərazilərdə sakinlərlə görüşlər keçirməsi isə insanın müraciətinin kabinetdən deyil, yaşadığı mühitdən eşidilməsinə imkan verən mühüm yanaşmadır. Belə münasibət dövlət qulluqçusunun üzərinə düşən məsuliyyətin və insan amilinə verilən dəyərin göstəricisi kimi qiymətləndirilə bilər.
Gəncə kimi böyük və qədim şəhərin idarə olunması eyni zamanda geniş məsuliyyət, sistemli iş və müxtəlif sahələr arasında düzgün koordinasiya tələb edir. Şəhərin abadlığı, kommunal xidmətlərin təşkili, sosial məsələlərin diqqətdə saxlanılması, sakinlərin müraciətlərinə çevik münasibət və mövcud problemlərin mərhələli şəkildə aradan qaldırılması bu fəaliyyətin mühüm istiqamətlərini təşkil edir. Niyazi Bayramovun rəhbərliyi ilə keçirilən görüşlərdə müxtəlif qurumların məsul şəxslərinin bir araya gətirilməsi də problemlərin həllində koordinasiyalı yanaşmanın əhəmiyyətini göstərir. Burada əsas məqsəd sakin tərəfindən səsləndirilən məsələni aidiyyəti quruma çatdırmaqla kifayətlənməmək, onun həlli istiqamətində konkret mexanizmin müəyyənləşdirilməsidir.
Dövlətimizin ərazi bütövlüyü və suverenliyi uğrunda canından keçmiş şəhidlərimizin ailələrinə, eləcə də qazilərimizə göstərilən diqqət və ehtiram isə cəmiyyətimizin mənəvi borcu olmaqla yanaşı, dövlət siyasətinin mühüm sosial istiqamətlərindən biridir. Gəncədə də şəhid ailələrinin, qazilərin və müharibə iştirakçılarının qayğılarının diqqətdə saxlanılması, onların müraciətlərinə həssas yanaşılması xüsusi əhəmiyyət daşıyır. Niyazi Bayramovun rəhbərlik etdiyi şəhər icra hakimiyyətinin fəaliyyətində bu kateqoriyadan olan vətəndaşların problemlərinə diqqətlə yanaşılması dövlətimizin şəhid ailələrinə və qazilərimizə göstərdiyi yüksək ehtiramın yerli səviyyədə davam etdirilməsi baxımından mühüm əhəmiyyət kəsb edir. Vətən qarşısında böyük xidmətləri olan insanların və onların ailələrinin yanında olmaq yalnız vəzifə deyil, həm də mənəvi məsuliyyətdir.
Sakinlərin keçirilən görüş zamanı göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını ifadə etmələri də dövlət-vətəndaş münasibətlərində qarşılıqlı etimadın əhəmiyyətini bir daha nümayiş etdirir. Prezident İlham Əliyevin müəyyən etdiyi vətəndaş məmnunluğuna əsaslanan idarəçilik prinsiplərinin yerlərdə düzgün təşkili, insanların müraciətlərinə diqqətlə yanaşılması və sosial problemlərin həlli istiqamətində əməli tədbirlərin görülməsi hər bir yerli icra strukturunun əsas vəzifələrindəndir. Bu baxımdan Gəncədə keçirilən səyyar görüşlər dövlət siyasətinin əsas xəttinin – insanlara xidmət və onların rifahının yüksəldilməsi prinsipinin yerli səviyyədə həyata keçirilməsinin nümunələrindən biri kimi çıxış edir.
Niyazi Bayramovun fəaliyyətində diqqət çəkən əsas cəhətlərdən biri də şəhər sakinləri ilə ünsiyyətin davamlı xarakter daşımasıdır. İnsanları dinləmək, onların qayğılarına həssaslıqla yanaşmaq, aidiyyəti qurumları bir masa ətrafında toplayaraq məsələlərin həllinə çalışmaq rəhbərlik məsuliyyətinin mühüm göstəricilərindəndir. Gəncənin abad, rahat və sosial baxımdan daha əlverişli şəhər kimi inkişaf etdirilməsi istiqamətində görülən işlərlə yanaşı, şəhid ailələrinin, qazilərin və sosial qayğıya ehtiyacı olan insanların diqqətdə saxlanılması bu fəaliyyətə xüsusi məna verir. Məhz vətəndaşın yanında olmaq, onun sözünü eşitmək və probleminin həllinə məsuliyyətlə yanaşmaq dövlət idarəçiliyinə olan etimadı möhkəmləndirən ən mühüm amillərdən biridir.
